بسم الله الرحمن الرحيم
الحمد لله وكفى، وصلاة وسلاماً على عبده المصطفى، وعلى آله وصحبه ومن اقتفى
رب اشرح لى صدرى ويسرلى امرى واحلل عقدة من لسانى يفقهه قولى
وبعــــــــــــــد
عمى .... انا طالب القرب منك
محدش يستغرب من العنوان لان دا كان هو عنوان الرساله اللى جاتلى
واللى طلب صاحبها منى في حالة نشرها ان تكون بنفس النص والصيغة دون اى تعديل فيها
وانا وعدته انى هنزل نص الرساله بتاعته كامله باذن الله
وبتعديل بسيط جداااا
اما موضوع النهارده فهو موضوع بيمر بيه كل الشباب في الجيل الحالى اللى من امنياته الطبيعية تكوين أسرة لمواجهة صعوبات الحياة المختلفة
وزى مااتعودنا ندخل على الموضوع مباشرة ونشوف الرسالة بتقول ايه
---------------------
عمى أنا طالب القرب منك
مين فينا مش بيحلم بالجملة دى (ماعدا الناس المتجوزة طبعا )
مين فينا مابيحلمش إنه يروح علشان يخطب البنت اللى بيحبها
ويقعد أدام باباها وهو لابس بدلة جديدة ونضارة الشمس فى ايده اليمين والموبايل فى الايد الشمال
ويقوله
ياعمى
أنا طالب القرب منك
حلم جميل .... صح
بس ليه دايما الحلم بيخلص هنا؟؟؟
عمرنا ماحلمنا برد أبو العروسة
عارفين الرد بيكون ايه
حاجة من اتنين
ياإما يقوله (ماتقرب ياابنى .. وانت قاعد بعيد ليه)
ياإما هيقوله (ياابنى احنا ماعندناش بنات للجواز)
تخيل نفسك راجع من موقف زى ده
وانت رايح وكلك أمل وأخيرا هتتجوز البنت اللى بتحبها وهى أخيرا هتتجوز الولد اللى بتحبه
عارف هتعمل ايه
حاجة من اتنين برده
ياتنتن .......... ياتنتن
يعنى ياتنتحر........... ياتنحرف
مش عايز تنتن وتنتن
طيب والحل
الجواز دلوقتى أصبح مشكلة بجد
ومشكلة كبيرة كمان
انت علشان تروح تتجوز دلوقتى
هتلاقى أهل العروسة عاملين استمارة بالطلبات للعريس المتقدم
خد عندك
أولا الشبكة ولازم تكون حاجه أد المقام
ثانيا الشقة ولازم تكون في حته كويسه
دا غير شغلانه لازم تدخلك مبلغ يعيش بنتنا عيشه كويسه
والعربية ماركة جيب شروكى (لو بى ام دبليو مفيش مانع)
وغيره وغيره
استمارة طويييييييييييييييييييييييييلة (كل واحد يروح يتقدم يدفع خمسة جنيه وياخد استمارة الطلبات ويروح)
واللى يقدر يملى الاستمارة وينفذ الطلبات
يقولوله يامرحب يامرحب بعريس بنتنا
طيب والشباب الغلبان اللى لسه فى بداية حياته ده
يعمل ايه
يعنى أسيب البنت اللى بحبها علشان ظروفى مش سامحة بالشقة والعربية والشبكة والمقدم والمؤخر و..و..و.....
قعدت افكر مع نفسي شوبة ..
نعمل إيه عشان الأزمة دي تتحل وكل واحد يتجوز البنت اللي بيحبها ؟ وكل واحدة تتجوز الولد اللى بتحبه؟
وبعد عناء طويل من التفكير
فكرت إننا ممكن نعمل زى أحمد السقا ونروح نستولى على الجزيرة اللى فيها مبنى ماسبيرو
ونعلن في القناة الخامسة ان الحكومة هتعمل مستقبل للشباب
علشان لما يخش على ابو العروسه يقوله أنا خريج تجارة وباشتغل في البنك الأهلي بخمستلاف جنيه !
كده وكده يعنى
بس لقيت إنه مش بعيد واحنا فى المبنى نلاقى أباتشى ضربت المبنى صاروخ
و افتكرت فيلم بركان الغضب لما الجيش نزل الشارع عشان يدافع عن الحكومة ..
فالعلمية كده مش هتنفع ..
طب وبعدين !
احنا عايزين فلوس دلوقتي نجيب شقة وعربية وشبكة وشغلانه نضيفة ..
هنعمل ايه ؟؟ ايه الحيرة دي بس ياربي !!
فكرت في حاجه تانيه ..
أسرق !!
أعمل زي أحمد السقا برده ..
البس اسود في اسود وأروح فيلا من فيلل الأغنيا
وآخد معايا كشاف وأحط فيه حجرين ماركة القط الاسود علشان ما يفصلش
وأتسلل من النافذه
وأسرقلي ييجي 15488893 مليون جنيه ولا حاجه كده من الخزنة وأطلع أجري
والصبح اقوم فاتح سنترال ومحل موبيليا وفرن افرنجي وعربية كبدة في الموقف الجديد
واعيش منهم ملك
واتقدم بعدها بتلات ايام شهرين كده لابو البنت اللي هاتجوزها
ويقولي يا مرحب يا إبني إحنا بنشتري راجل والله
بس راجل عنده سنترال وفرن افرنجي وعربية كبده في الموقف
أومال راجل ازاي ..
هو الراجل يبقى راجل من غير كام باكو كده بيخشولوا كل شهر !!
وفجأة ألاقي البوليس هاجم علي وانا عند أهل عروستي
بيقولولي هات ياض الفلوس اللي سرقتها
طبعا انا عشان منحوس البوليس ساب اليوم كله ومسكني اليوم اللي هاخطب فيه وعند أهلها
طبعا الخطوبة هتتفشكل ..
ولو بعتّ المشكلة فى برنامج بين الناس مش هنوصل لحل برده
لأنهم عمرهم ماوصلوا لحل
طيب والحل ايه بأه؟؟؟؟
ازاى نحل المشكلة دى؟؟؟
ازاى كل واحد يتجوز البنت اللى بيحبها وكل واحدة تتجوز الولد اللى بتحبه؟؟؟
العيب فينا ولا فى الزمن ولا فى ايه ؟؟؟؟؟؟
كلها أسئلة بدون إجابات
أنا تعبت من التفكير ومش عارف ليه تفكيرى كله فى أحمد السقا
اللى عنده فكرة تانية
بس بشرط
(مايكونش فيها أحمد السقا خالص )
يقولها ويلحقنا قبل مانلجأ للحلين اياهم (فاكرينهم ياتنتن .. ياتنتن )
واللى مش عنده حل يجهز اللبس الأسود والكشاف وماينساش الحجرين القط الأسود
انتهت الرساله هنا
منتظر ردودكم
Falling hearts Here
26 اللى قالوا رأيهم:
طبعا ، كل الابهات عايزين يجوزوا بناتهم احسن جوازة .
مفيش خلاف علي كده .
ولكن بالتفاهم والتحاور ،، الامور بتمشي .(( اهم شئ ان يطمئن الاب علي ابنته انها في امان ))
غير ان البنت لها دور ، فهي تحكي لامها وتخبرها ان ذلك الشخص للمناسب التي تحبه ...الخ .
لكن موضوع الشقة والعربية ،، دي صورة قديمة ملتصقة بذهن الشعب المصري ،، لكن ارض الواقع مختلفة
عفريت الشباب المصرى... الزواج
^_^
مين قال ان دا هايكون الوضع لو راح لاهلها؟
هى دى الفكرة ان الناس بتخاف من الفشل من قبل ما تواجهه
اما عن الاهل لا انكر ان هناك كثير من الاهالى يبالغون
لكن السبب الحقيقى للمبالغة هذه خوفهم على ابنتهم.. فان اقتنعوا انها بمامن معه فلن يضعوا تلك العواقب بل سيساعدوهم باقصى ما يستطيعوا وقد رايت هذا بنفسى من الكثير من الاهالى ايضا...
الفكرة انه يتمكن من كسب ثقة اهلها وثقتها هى نفسها
لان الزواج مش مجرد كلام دمه خفيف وبس...دا مسؤلية
وبرضه الانسان اللى بيفكر يتقدم لاى واحدة لازم يبقى عقلانى...لازم يكون قادر على كسب ثقتهم...لازم يخليهم مطمئنين وهم بيعطوه ابنتهم... والماديات مش اهم حاجة لانها مع الوقت بتيجى..عموما الموضوع بيختلف من حالة لاخرى
اهم حاجة...
سيبك من احمد السقا خااااالص
تحياتى
ردي على الموضوع ده في بوست عندي كاتباه اسمه هي وصاحبتها
أخى أسامه لقدأصبتنى بالاحباط ليس الأمر بهذا السوء أبدا ، الأهالى لسه بخير وكل بيت فيه برضه شاب ، أنا متزوجه واخوتى الثلاثه وكثير من أقاربنا ولم أسمع أوأرى هذه الطلبات ، وقد قال (صلى الله عليه وسلم )ثلاث حق على الله أن يعينهم ..منهم الناكح يريد العفاف ) تفائلوا بالخير تجدوه ، رزقك الله كل ما تتمناه ..
ده مشكلة المشاكل الماديات دى
يا ناس عمر الشقق الفخمه والعربيه والشغاله ما بتعمل حياه سعيده
المهم الانسان البشر اليى بتعيش معاه بنتكوا هيعاملها بأدميه ولاا هيستعبدها ويعاملها كانها برطمان مربى منتهى الصلاحيه
البوست جميل
ويا رب الاهل يفهموا ويعوا
ابنى اسامه من يتقى الله يجعل له مخرجا ويرزقه من حيث لا يحتسب ومن يتوكل على الله فهو حسبه خذ بالاسباب المتاحه والحلال وتوكل على الله وصدقنى لا احد يمكن ان يتزوج غير زوجته التى قدرها له الله وعليك بالاستغفار فهو يجلب الرزق ولا تنسى (وفى السماء رزقكم وما توعدون )رزقك الله الزوجه الصالحه
أخى الفاضل انا مع صديقة لى بأن الأمر ليس بهذا السوء فالننظر لأنفسنا أولا فربما هذا يرجع لإختيارنا فقبل ان تختار الفتاة فانظر الى اهلها وربما اليها ايضا فإن كانت تتقى الله فسيكون أهلها كذلك وسيردون لها من يكون رجلا بمعنى الكلمة ولا ينظرون الى مثل هذه المظاهر الكاذبة .
اهم حاجة الواحد يكون مقتنع ان نصيبه مكتوب قبل ما يتولد ..
ولن تموت نفس حتي تستكمل اجلها ورزقها
دمت بخير
اخى الفاضل اسمح لى ان اعلق على هذه الرسالة تعليقا من وجهة نظرى وليس اعتراضا على ما جاء فى الرسالة وسيكون هذا التعليق فى مدونتى ان سمحت لى بشىء من التفصيل .
فهل تسمح لى ....؟
عندك حق فى كل اللى بتقوله المشكله ان الزمن اللى احنا فيه بقى النفوس وحشه والناس بقى صعب تامن لهم عشان كده كل اب وام بيخافوا على بنتهم وبيفضلوا لحد اخر لحظه قلقنين من الانسان اللى بترتبط بيه بس صدقنى لو وثقوا فى الانسان ده واطمنوا له وحسوا ان بنتهم عيزاه بجد ساعتها ممكن يتنازلوا عن حاجات كتير اوى وربنا يوفق كل الشباب للى فيه الخير
ههههههههههههه
سمسم والله مش عارفه اقولك ايييييييه
بس قولى نعمل ايه فى اهالينا بقى
؟؟؟؟؟؟؟؟؟؟
الله المستعان
هما كده ومش هيتغيروا والله
ما انت عارف الشعب المصرى
وسلم لى على مصررررررررر
والله يابنى كان مستعد يعمل اى شئ
عشان سعادة بنتهم بس الأخ
المفروض انه حبيب عمرها
خايف من ناحية تانية
ايه هى مش عارفه ايه
المهم هو لو جه هيلاقى باباها
هيخده بالحضن ويقوله يابنى
الكتف دا زاد والكتف دا ميه
ههههههههههههههههههههه
بس مش جه هنعمل ايه
موضوع جميل يا اسامة بس على فكرة
فيه كتير من الابهات بيكونو متفهمين
المهم انهم يحسوا ان الانسان دا امين على
بنتهم وهيحافظ عليها
تقبل مرورى
smilyrose
روح الحب الصادق
لا حول ولاقوة إلا بالله ....
الشباب ومشكلته الأزليه ...
كيف أتزوج...
..........
بالسابق كان الكل يلتف حول الشاب ويسهلون له العقبات ليزوجوه واول المساعدين أهل العروس الذين يشترون رجلا (من غير كم باكو)...
أما الآن الأهل بيستنوا العريس يشرف ويطفشوه ويسألوا ليه بنتنا كملت ال40 وماتجوزتش...
...........
حل .......
والله ثم والله أبسط حل في الدنيا...
العوده لأصول الدين القويم..
.......
دمت بخير
ههههههههههههههههههه
والله وعرفت تضحكني
كوميديا سودا انا عارفة
العيب فينا احنا
ان الله لا يغير ما بقوم حتى يغيروا ما بانفسهم
لو كل اب حط العريس دة في وضعية ابنه هيتحل الوضع ويبقى الزواج مفيهاش حاجة انه يبداوا مع بعض بالضروري جدا وبعدها يكبروا سوا انما هنقول ايه بس
تحياتي
موضوع جميل يحمل الكثير من الإحباط
تذكر أخي قول الرسول صلى الله عليه وسلم (( ثلاثة حقا على الله أن يعينهم)) منهم
(( والناكح يريد العفاف))
اللهم ارزقنا الزوجة الصالحة
والله كل واحد بياخد نصيبه خاصة في الزواج
فبلاش قلق وخوف لان المكتوب لازم واكيد هنشوفه
تحياتي
عزيزى
قبل ما نتكلم على مواقف غيرنا
نشوف احنا بنعمل ايه وساكتين على ايه
مدونة قطة الصحراء
فى عز ضرب حماس وغزه
والشهداء اللى بتبكى عليهم
بتقول
يبقى حماس والاخوان والجهاد إلى اسفل السافلين
ربنا ينتقم من الحمساوية ومن الاخوان ومن الجهاد
طبعا مفيش اسرائيل ولا امريكا
انا بعتبرها سافله وخايبه وبقول
ربنا ينتقم منها بدم الشهداء
حضرتك بتخش عندها وشايفها ايه
وبلاش نتكلم عن حكامنا وضعفهم
لانكم اضعف من حكامكم بسكتكم وترحبكم بالقذره دى
مستنى رائيك
وموقفك الواضح والحاسم
التدويين راى وموقف
مش صحبة ولمه وتبادل زيارات
بالذات فى موضوع خطير كده
وبلاش تقولى ده راى
دى عمالة وخيانة وقذراة وزبالة
وده لينك الموضوع
http://mshmuwafk.blogspot.com/
سلام
وليه ده كله؟
اتقدم لواحدة تانية وخلاص تكون هى واهلها راضيين بامكانياتك
السلام عليكم
قال رسول الله صلى الله عليه وسم:((أعظم النكاح أيسره))
الإسلام حثنا على التيسير للشباب في الجواز
بس مين يسمع
ومين يطبق السنه
هو صحيح الاب والام بيكونوا عايزين يجوزوا بنتهم انسان يسعدها بس مش كل حاجه بالفلوس
والرسول صلى الله عليه وسلم قال:((إن جائكم من ترضون دينه وخلقه فزوجوه))
~~~~~~~~~~~~~~
وحابه افكرك انك وعدتني متكونش زيارتك تخر زيارة ومع كدا مجتليش تاني
يلا هسامحك لله
هههههههههههه
دمت بكل ود
تحيــــــــاتي(:
من حق كل اب وام ان يطمنوا على بنتهم زى ما الشباب بيقعد يدور ويختار وينقى
بس المهم تكون الطلبات فى حدود معقوله
ومقبوله وخاصه فى ظل ازمه الشباب والبنات كلهم دلوقتى
اللى والده مش بيساعده غالبا بيكون فى ازمه كبيره لان المرتبات فى مصر مش تكفى تعيش كفرد فماباللك باسره
بس لازم نعرف بردوا ان النصيب والقسمه هما اللى بيحكموا فى الاخر
دمت طيب
السلام عليكم
اولا اسلوبك جميل وأنا سعيد جدا بمعرفة مدونتك ومعرفتك
ثانيا بقى وثالثا الموضوع ده مهم جدا .. أنا الحمد لله اتخطيت المرحلة دي . أقصد مرحلة القعدة قدام أبوها .. قعدنا خلاص ولله الحمد :) ربنا ييسر بالزواج
أنا كنت كتبت موضوع بعنوان
الله أكبر ..ثلاثة دراهم لا تعف مسلماً !!
http://habibworld.blogspot.com/2008/06/blog-post_2188.html
أظن فيه بعض الحلول ممكن تكون مفيدة
تحياتي
عندك حق طبعا تكاليف الزواج بقيت حاجة غير عادية
ربنا يعنا عليها يارب
دمت فى حفظ الله
هههههههههههههه
دى مصارعه مش جواز حقيقى بجد بوست زى العسل ومشكله حقيقى فعلا موجوده لكل الشباب بس انا فى راييى الخاص ان الستر اهم ما فى الموضوع يعنى كل طرف من العائلتين الى يقدر يوفق ويعمل حاجه يعملها مش يتشرطوا اوى ويضغطوا على العريس وهات وهات وهات
يعنى الحياه عباره عن خطوات لازم نمشيها واحده واحده
بجد بحييك على كتاباتك وسعيده بانى بقيت صديقه للمدونه
الرساله مبكيه اكثر منها مضحكه
بل لا اظن ان بها ما يضحك
اتعرف ما الحل؟
الحل فى العودة لديننا
ان نعود لاسلامنا
ان ننفذ قول النبى
اذا جاءكم من ترضون دينه وخلقه فزوجوه الا تفعلوا تكن فتنه وفساد عريض
لم يقل النبى صلى الله عليه وسلم
اذا جاءكم من ترضون وظيفته وسيارته وشقته
بل قال الدين والخلق
طيب الفلوس؟
ان يكونوا فقراء يغنهم الله من فضله
مش هيموتوا من الجوع
ربنا قال
وما من دابة فى الارض الا وعلى الله رزقها
يعنى واجب على ربنا ان يرزقه
يعنى الامر منتهى
لا تقولى شبكه(التمسوا ولو خاتم من حديد)
احنا عاملين فى الكليه حمله اسمها
عروسه من غير شبكه
جل البنات موافقه على الامر
يبقى الاباء
واظن ان هذا دور العلماء والمشايخ
العفه
بالعفه ترقى الامه
مقالتك فجرت لى فكره مقاله اخرى
ستجدها قريبا على مدونتى
أشكركم جميعا على تفاعلكم القوى جدا
فى مناقشة هذه المشكله
وكل تعليق فعلا فيه مناقشة المشكله من زاوية مختلفة وان كانت النتيجة واحده
اشكركم مرة اخرى على تواجدكم وعلى تعليقاتكم الاكثر من رائعة
تحياتى للجميع بكل حب
هو عمك وافق واتجوزت؟؟؟
انت ليه اختفيت؟؟
إرسال تعليق